Ўзбекистонда «заправка»лар икки ойда салкам 42 млрд сўмлик газдан ноқонуний фойдалангани аниқланди
Давлат хавфсизлиги хизматининг «Ўзнефтгазинспекция» ҳамда «Ўзтрансгаз» АЖ билан ҳамкорликдаги назорат тадбирлари давом эттирилмоқда. Бу ҳақда «Ўзнефтгазинспекция» ахборот хизмати хабар берди.
Маълум қилинишича, 2022 йилнинг июнь–июль ойларида автомобилларга газ тўлдириш компрессор шохобчаларида ўтказилган навбатдаги тадбирлар давомида бир қатор «запраква»ларда табиий газдан фойдаланишда қонун бузилиш ҳолатларига йўл қўйилгани аниқланган.
Жумладан, Бухоро вилоятидаги 3 та АГТКШда 2,2 миллиард сўмлик, Самарқанд вилоятидаги 2 та АГТКШда 3,3 миллиард сўмлик, Сирдарё вилоятидаги 5 та АГТКШда 3,6 миллиард сўмлик, Жиззах вилоятидаги 17 та АГТКШда 31,3 миллиард сўмлик ва Қашқадарё вилоятидаги 1 та АГТКШда 1,5 миллиард сўмлик табиий газдан ноқонуний фойдаланиш ҳолатлари фош бўлган. Қоидабузарликлар шохобчаларнинг ўлчов тизимларидаги кўрсаткичларга ташқи таъсир ўтказиш орқали содир этилган.
Ҳисоб-китобларга асосан, мазкур корхоналар томонидан давлат манфаатларига етказилган зарар миқдори 41,9 миллиард сўмни ёки 209 мингга яқин хонадонларни ёз мавсумидаги бир ойлик истеъмолига тенг бўлган табиий газдан ноқонуний фойдаланиб келингани маълум бўлган.
